ເມື່ອວັນທີ 25 ເດືອນພະຈິກຜ່ານມາ ຮ້ານເຊເວັ່ນ ອີເລຟເວັ່ນ ສາຂາບ້ານສະພານທອງ ນະຄອນຫຼວງວຽງຈັນ ໄດ້ເປີດໃຫ້ບໍລິການຢ່າງເປັນທາງແລ້ວ ເຊິ່ງເປັນຮ້ານສາຂາທີ່ບໍລິຫານໂດຍຜູ້ຮ່ວມທຸລະກິດຊາວລາວ ຕາມນະໂຍບາຍ ສ້າງງານ ສ້າງອາຊີບ ຂອງຊີພີ ອໍລ໌.
ພາຍໃນງານ ໄດ້ຮັບກຽດຈາກ ທ່ານນາງ ເພັດໄພລິນ ຈັນທະບູລີ ຜູ້ຮ່ວມທຸລະກິດ ຮ້ານເຊເວັ່ນ ອີເລຟເວັ່ນ ສາຂາບ້ານສະພານທອງ, ແລະ ທ່ານ ທະນະດົນ ອ້ຽວສິວິກູນ ຜູ້ອຳນວຍການ ບໍລິສັດ ສະຕາຣ໌ ຣີເທລ ຈຳກັດ, ແລະ ທ່ານ ທາຕຣີ ຈິຣະບັນຈົງຈິດ Managing Director ບໍລິສັດ ຊີພີ ອໍລ໌ ລາວ ຈຳກັດ ໃນກຸ່ມຊີພີ ອໍລ໌ ເຂົ້າຮ່ວມພິທີເປີດ.
ຮ້ານເຊເວັ່ນ ອີເລຟເວັ່ນ ສາຂາບ້ານສະພານທອງແຫ່ງນີ້ ຕັ້ງຢູ່ໃກ້ກັບ ໂຮງໝໍທະຫານ 103 ຖືເປັນຮ້ານສາຂາທີ 10 ຢູ່ໃນ ສປປ ລາວ ນັບຕັ້ງແຕ່ ຊີພີ ອໍລ໌ ລາວ ໄດ້ເຂົ້າມາເປີດດຳເນີນການບໍລິຫານຮ້ານເຊເວັ່ນ ອີເລຟເວັ່ນ ຢູ່ໃນ ສປປ ລາວ ສາຂາທຳອິດ ເມື່ອວັນທີ 7 ເດືອນກັນຍາປີກາຍນີ້ ໄດ້ດຳເນີນທຸລະກິດດ້ວຍການຍຶດໝັ້ນໃນຄ່ານິຍົມ 3 ປະໂຫຍດຂອງເຄືອຈະເລີນໂພກພັນ ຄອບຄູ່ໄປກັບການເອົາໃຈໃສ່ໃນຄຸນນະພາບສິນຄ້າ ແລະ ການບໍລິການ ໃຫ້ເປັນໄປຕາມມາດຕະຖານ ເພື່ອໃຫ້ເປັນອີກໜຶ່ງໃນຕົວເລືອກຂອງຜູ້ບໍລິໂພກ ເຊິ່ງຖືເປັນກ້າວສຳຄັນຂອງການຂະຫຍາຍທຸລະກິດເຊເວັ່ນ ອີເລຟເວັ່ນ ຢູ່ໃນ ສປປ ລາວ.
